Human & Rousseau-boekgesprek: Jonathan Amid in gesprek met Hannes Barnard oor Die wet van Gauteng

NB Publishers

Luister in die jongste episode van ons podsending na Jonathan Amid se gesprek met Hannes Barnard oor sy aksiebelaaide spanningsroman, Die wet van Gauteng. Waaroor gaan Die wet van Gauteng? Kaptein Cindie McKelly, ’n forensiese spesialis van Randfontein Polisiestasie, word een oggend in Februarie na ’n misdaadtoneel in Kagiso ontbied. Daar vind sy die oorskot van drie slagoffers in ’n verwaarloosde klinkersteenhuis: Twee Somaliese vroue en een Suid-Afrikaner – laasgenoemde met ’n koeëlronde gat waar sy linkeroog behoort te wees. Vroeg April ontvang Cindie ’n oproep van kaptein Awande Mhlanga, speurder in Parktown, oor drie moorde wat blykbaar ooreenstem met haar eie ondersoek. En ’n paar dae later vind hulle nóg ’n slagoffer met dieselfde modus operandi, op Muldersdrift. ’n Taakmag word saamgestel om die Oogarts, soos die media na die skerpskutter verwys, vas te trek. Ten spyte van ’n onbekwame brigadier en ewig krimpende begrotings, begin Cindie en Awande geleidelik ’n komplekse netwerk ontrafel wat staatskaping laat lyk na swieties steel in die hoekkafee. Die wet van Gauteng, Hannes Barnard se debuutspanningsroman, het ’n verweefde, eg Suid-Afrikaanse intrige: politieke faksiegevegte, aartskorrupsie én geldwassery. 'n Hoogs leesbare politieke riller, aksiebelaaid en meesleurend. Hierdie gesprek is oorspronklik in April 2022 hier op Netwerk24.com uitgesaai: https://www.netwerk24.com/netwerk24/kunste/boeke/vir-jou-dagboek-hannes-barnard-gesels-oor-sy-nuwe-politieke-riller-20220401 Bestel Die wet van Gauteng (Human & Rousseau) deur Hannes Barnard by goeie boek- en aanlyn winkels. Dit is ook as e-boek beskikbaar. Musiek: “Hard to Love” deur HoliznaCC0 (https://freemusicarchive.org/music/holiznacc0/music-from-the-vault/hard-to-love/)